Жәңгір хан университетінің студенттері Қазақстан Жазушылар одағының мүшесі, танымал жазушы, облыстық «Орал өңірі» қоғамдық-саяси газетінің бас редакторы Бауыржан Ғұбайдуллинмен кездесті.
Университеттің «Парасат» ақпараттық білім беру орталығы ұйымдастырған тағылымды кешті Ақпараттық жұмыс басқармасының басшысы Болатбек Сахиев жүргізді. Алдымен студенттерге кездесудің құрметті қонағы Бауыржан Файзоллаұлының өмір жолы мен шығармашылығы туралы мағлұмат таныстырылды.
Өзінің балалық шағы, еңбекке араласқан жылдары, шығармалары туралы кеңінен әңгімелеген қаламгер жастарды білім алуға, кітап оқуға, өмірде дұрыс таңдау жасай білуге шақырды.
Кеш барысында білім алушылар жазушының шығармалары туралы ой-пікірлерімен бөлісті. Рухани іс-шара соңында студенттер жазушы-журналист Бауыржан Файзоллаұлымен естелік суретке түсті.
